Hoekom Baillies?
By Laerskool Baillie Park is ons verbind tot uitnemende en verantwoordbare opvoeding. Ons benadering tot akademie, sport en kultuur is gewortel in Christelike waardes, wat ons as riglyn en grondslag vir ons onderrig en skoolgemeenskap gebruik. Met ‘n onwrikbare geloof in die waarde en noodsaaklikheid van ‘n opvoeder se rol, streef ons daarna om elke leerder se volle potensiaal te ontwikkel.
Ons handhaaf ‘n oopdeurbeleid en moedig wedersydse kommunikasie aan, sodat enige vrae, uitdagings of voorstelle op ‘n positiewe manier aangespreek kan word.
Die sukses van ons skool – en veral die opvoeding van u kind – is ‘n spanpoging. Ons waardeer en benodig die ondersteuning en samewerking van ouers om ‘n omgewing van groei en prestasie te bevorder. Elke Baillie Parker het ‘n verantwoordelikheid om ons skool se naam met trots te dra en te versterk. Saam bou ons ‘n skoolgemeenskap waar kind, ouer en onderwyser ‘n ware vennootskap vorm – ‘n vennootskap in aksie!
Doel en Strewe
Visie
Laerskool Baillie Park – die skool waar leerders toegerus word vir die toekoms.
Missie
Ons streef daarna om ‘n skoolgemeenskap te bou waarin elke leerder, onderwyser en ouer met trots en toewyding betrokke is.
Ons strewe na ’n Baillie wat:
- Trots is op sy/haar skool, tradisies en gebruike.
- Gebalanseerd deelneem en sy/haar volle potensiaal bereik.
- Gedissiplineerd, gemotiveerd, hoflik en verantwoordelik is.
- Met kernwaardes soos integriteit, lojaliteit, respek, nederigheid en goedhartigheid toegerus word.
- Wanneer hy/sy Potchefstroom verlaat, volkome voorbereid is vir die lewe en die uitdagings van die toekoms.
Ons strewe na ‘n personeellid wat:
- Sy/haar talente en gawes inspan om die skool se doelwitte te bereik.
- Die belange van leerders eerste stel en lojale samewerking met kollegas toon.
- Deel voel van ‘n sterk, samewerkende span.
Ons strewe na ‘n skool wat:
- ‘n Warm en inklusiewe omgewing skep vir almal wat ons missie onderskryf.
- ‘n Hoë standaard van opvoeding en dissipline handhaaf.
- Sy eie unieke karakter, etos en tradisies koester en bevorder.
Doelstellings van Laerskool Baillie Park:
- Die handhawing, beskerming en bevordering van doelgerigte onderwys gegrond op vaste waardes.
- Die erkenning en beskerming van vryheid van geloof, spraak en assosiasie.
- Die gebruik en behoud van Afrikaans as amptelike voertaal en onderrigmedium.
- Die strewe na hoë akademiese en onderrigstandaarde.
- Die bevordering van buitekurrikulêre aktiwiteite om leerders holisties te ontwikkel.
- Die uitbou en beskerming van die skool se karakter, etos, skoollied, skoolwapen en leuse.
- Die opvoeding van leerders tot verantwoordelike burgers.
- Voortgesette personeelontwikkeling en opleiding.
- Die identifisering en ontwikkeling van jong leiers.
- Die uitbreiding van ‘n sterk vennootskap tussen skool, ouers en die gemeenskap.
By Laerskool Baillie Park glo ons dat ‘n kind, ‘n ouer en ‘n skool saam ‘n sterk toekoms bou!
Algemene Inligting
SKOOLTYE
Graad 1 – 2 07:25 – 13:00 (Maandae – Vrydae)
Graad 3 07:25 – 13:10 (Maandae – Vrydae)
Graad 4 – 7 07:25 – 13:40 (Maandae – Donderdae)
Graad 4 – 7 07:25 – 13:10 (Vrydae)
Leerders word versoek om betyds op die skoolterrein te wees om ‘n gestruktureerde en produktiewe skooldag te verseker. Laat aankoms versteur die leerproses en beïnvloed die skool se dissipline.
Klerebank tye:
Dinsdae en Donderdae – 07:30 – 09:00
Slegs kontant betaalbaar.
Die klerebank bied ‘n bekostigbare opsie vir skoolklere en ondersteun gesinne wat tweedehandse uniforms benodig. Ons moedig ouers aan om skoon, herbruikbare skoolklere en tekkies te skenk om ander gesinne te help.
SKOOLLIED
Aan Mooirivier se groene soom
Waar eikeboom en wilger troon
Waar westewind die weste groet
Het ons verrys uit Trekkers bloed.
Uit dwinglandy is ons gebore
Vir ons is nooit die stryd verlore
Aan ons verlede bly ons steeds getrou
Ons leef te handhaaf en te bou.
O Leidsman, skenk ons tog die krag
Laat ons as jeug net dit vermag
Maak so die roepstem van ons jeug
In arbeid lê die grootste vreug.
Woorde: Mnr. H.F. Malan
Toonsetting: Mev. A. Swart
SKOOLWAPEN
VYFHOEKIGE ONTWERP
Dit is ontleen aan die vyfhoekwapen van die oorspronklike Vyfhoekskool.
DIE MONUMENT
Verwys na ons verbondenheid met die verlede en die tentskool waaruit Vyfhoekskool en later Baillie Park gegroei het.
(Konsentrasiekampmonument)
LEUSE
ARBEI MET VREUGDE is die lewensfilosofie van elke Baillie Parker.
Geskiedenis van Laerskool Baillie Park
1903 – Die Begin van ‘n Droom
Die skool het sy oorsprong as ‘n tentskool op die plaas Vyfhoek, wat aan Mnr. John Baillie behoort het. Dit is vanweë hom dat die skool later die naam Baillie Park gekry het.
Maart 1904 – Eerste Permanente Skoolgebou
Die skool groei en ‘n permanente skoolgebou word opgerig – bekend as die Vyfhoekskool. Hierdie gebou sou vir meer as ses dekades die sentrum van leer vir jong leerders in die gemeenskap wees.
Oktober 1964 – ‘n Nuwe Era Begin
Met die toename in leerdergetalle en die behoefte aan ‘n groter skool, word bouwerk aan die nuwe Laerskool Baillie Park begin.
6 September 1966 – Die Groot Oorplasing
Die skool ontvang op 1 September 1966 amptelike kennis dat hulle op 6 September 1966 na die nuwe gebou kan verhuis.
Ongelukkig is die skoolhoof, Mnr. F. Jooste, op daardie tydstip ernstig siek en kon hy nie die amptelike afsluiting van Vyfhoekskool of die opening van die nuwe Laerskool Baillie Park bywoon nie. Die pligte is waargeneem deur waarnemende hoof, Mnr. L.H. Labuschagne.
1967 – ‘n Nuwe Hoof Neem Oor
Mnr. F.B.C. Kirsten word as die nuwe hoof van Laerskool Baillie Park aangestel en dien in dié pos vir 20 jaar (1967–1987).
1 Oktober 1987 – ‘n Nuwe Leier vir Baillies
Mnr. L.F. de Beer word die hoof van Laerskool Baillie Park en dra by tot die voortgesette groei en ontwikkeling van die skool.
1 Januarie 2013 – ‘n Nuwe Generasie
Mnr. Piet Müller word die nuwe skoolhoof en lei die skool vir baie jare met toewyding en visie. Mnr. Müller het afgetree aan die einde van 2024.
1 Januarie 2025 – Waarnemende Hoof
Mnr. Rieme Redelinghuys word aangestel as die waarnemende hoof van Laerskool Baillie Park.
Beheerliggaam
Hoof (wnd.)
admin@bailliepark.co.za
Voorsitter
voorsitter@bailliepark.co.za
Ondervoorsitter, Akademie en Naskool
hansievanvreden@gmail.com
Tesourier
finansies@bailliepark.co.za
Sport
fanus@gtegno.com
Kultuur
karlienvanzyl@gmail.com
Ouerskakeling en Akademie
crizelle.els@nwu.ac.za
Dissipline
kobus.n@bailliepark.co.za
Fondsinsameling, Bemarking en Naskool
benje.o@bailliepark.co.za
BL Sekretaresse en Kommunikasie
marissa.p@bailliepark.co.za
Die Beheerliggaam van Laerskool Baillie Park speel ‘n kritieke rol in die bestuur en administrasie van die skool. Dit bestaan uit gekwalifiseerde en betrokke lede van die gemeenskap, wat die skool se visie en missie ondersteun en verseker dat die skool in ooreenstemming met alle relevante wetgewing en regulasies werk. Die Beheerliggaam is betrokke by die goedkeuring van die skool se begroting, beleidsbesluite en strategiese planne. Dit is ook verantwoordelik vir die aanstelling van die skoolhoof en ander sleutelpersoneel, en hulle speel ‘n belangrike rol in die bevordering van die skool se akademiese en kulturele prestasies. Deur deursigtige kommunikasie en samewerking met die personeel en ouers help die Beheerliggaam om ‘n gesonde en produktiewe leeromgewing te verseker.
Leierstelsel
Laerskool Baillie Park het ‘n unieke leierstelsel waarin elke leerder in Graad 7 die kans kry om sy of haar leierskapvaardighede te toon.
In teenstelling met die meeste skole waar leiers reeds die vorige jaar aangewys word, glo ons dat sommige leerders, veral diegene wat nie altyd in buitekurrikulêre aktiwiteite uitstaan nie, nie altyd die geleenthede kry om hul potensiaal as leiers te wys nie. Ons is dikwels verras deur leerders wat, wanneer hulle die minste verwag word, as leiers opstaan en oorheers.
Elke kwartaal word ‘n nuwe groep leiers aangewys wat volle leierskapbevoegdhede kry. Hierdie leiers word noukeurig gemonitor en teen die einde van die derde kwartaal het elke Graad 7-leerder die kans gekry om as leier op te tree.
Aan die einde van die derde kwartaal, word die finale leiers gekies deur die Graad 7-leerders en personeel. Hierdie verkiesing is demokrasie-gegrond en deursigtig, wat verseker dat daar geen onduidelikheid is nie. Stembriewe word selfs beskikbaar gestel aan ouers wat enige twyfel het, sodat almal die geleentheid het om betrokke te wees.
Terrein
Veiligheid
Die veiligheid van ons leerders is ‘n prioriteit by Laerskool Baillie Park.
Ons wil graag daarop wys dat ons nie 24 uur sekuriteit rondom die skoolterrein het vir voertuie nie. As u buite die skool parkeer, vra ons dat u asseblief seker maak dat u motor goed gesluit is. Daar het ongelukkig al voorvalle van diefstal in voertuie plaasgevind tydens oefeninge en sportbyeenkomste. Ons versoek dat u ekstra waaksaam wees in hierdie verband.
