By Graad 1 streef ons daarna om elke kind geborge en veilig te laat voel. Ons span bestaan uit ervare onderwyseresse wat ‘n passie vir onderwys het, en ons poog om op hoogte te bly met die nuutste verwikkelinge in die onderwys. Elke Graad 1-onderwyser het ‘n assistent wat help om ‘n optimale leeromgewing te skep.

Volgens die Kurrikulum- en Assesseringsbeleidsverklaring (KABV) vir Graad R tot Graad 3, bestaan die Grondslagfase uit vier vakke:

• Huistaal (Afrikaans)
• Eerste Addisionele Taal (Engels)
• Wiskunde
• Lewensvaardigheid:
  • Aanvangskennis
  • Skeppende Kuns
  • Liggaamsopvoeding
  • Persoonlike en Sosiale Welsyn

Riglyne vir Graad 1

Die onderstaande inligting is slegs riglyne wat van ‘n voornemende Graad 1-leerder verwag word om Graad 1 te kan betree: 

Fynmotoriese ontwikkeling

• Kan vorms uit papier skeur en prente inkleur
• Kan eie naam skryf
• Kan ‘n menstekening maak wat besonderhede bevat
• Kan ‘n potlood reg vas hou 

Grootmotoriese ontwikkeling

• Kan eenbeen staan vir ongeveer 10 sekondes
• Kan eenbeen spring
• Kan huppel, draai, en rigting verander sonder om ritme te verloor
• Kan ‘n bal vang en gooi
• Kan postuur by tafel en op mat behou tydens werksessies
• Kan klim en klouter en is bereid om te waak 

Dominansie

• Die kind se handvoorkeur moet reeds bepaal wees

Visuele Persepsie

• Kan objekte t.o.v. mekaar plaas, byvoorbeeld, “Plaas die bal langs die stoel”
• Kan spesifieke letters of syfers tussen ander uitken
• Kan minstens ‘n 35-stuk legkaart bou

Lateraliteit

• Kan links/regs onderskei

Wiskunde ontwikkeling

• Moet minstens 10 voorwerpe kan uittel
• Moet voorwerpe volgens vorm, kleur of grootte kan sorteer
• Ken die verskillende kleure
• Weet wat die meeste en die minste is
• Kan voorwerpe na aanleiding van hulle vorm beskryf, byvoorbeeld: vierkantig, sirkelvormig en reghoekig 

Taalontwikkeling

• Kan oor eie wêreld gesels
• Kan tye (gister, vandag, môre) korrek gebruik
• Kan ‘n boodskap oordra
• Kan ‘n storie met opeenvolgende gebeure redelik akkuraat terug vertel 

Sosiale vaardighede

• Maak vriende
• Deel met ander
• Toon goeie samewerking in groepe
• Respekteer ander en hul eiendom 

Persoonlike sorg

• Kan eie tande borsel
• Kan skoenveters, knope en ritssluiters vasmaak
• Kan self aan- en uittrek 

Leerders met leerstruikelblokke

Inklusiwiteit vorm deel van ons daaglikse organisering, beplanning en onderrig by Graad 1. Ons onderwyseresse is opgelei om leerstruikelblokke te identifiseer en aan te pak, asook om vir diversiteit te beplan. Differensiasie word gebruik om die struikelblokke in die klaskamer aan te spreek, wat by elke leerder se ontwikkelingsvlak pas. 

Dissipline (Graad 1)

Dissipline is baie belangrik vir die handhawing van orde en roetine. Dit is belangrik dat ons as skool en u as ouers saamwerk om dissipline effektief toe te pas. Aan die begin van die Graad 1-jaar kry die leerders die geleentheid om aan te pas en die skoolreëls deeglik te behandel. Gedurende hierdie tydperk word die reëls ingeoefen, wat sowat twee maande neem. Daarna word die dissipline stelsel vir die res van die skooljaar toegepas.

Indien daar ‘n daadwerklike probleem is, sal die ouers onmiddellik in kennis gestel word sodat die saak aangespreek kan word. Vanaf kwartaal 2 sal die dissipline stelsel streng toegepas word, en inskrywings sal toegeken word vir sekere oortredings. Detensie sal ook as straf toegeken word indien nodig. 

Wagklasse

Leerders wat nie onmiddellik na skool afgehaal kan word nie, sal in die wagklas bly. Die Graad 1-juffrou is in haar klas tot 13:40 en sal toesig hou oor die leerders. Daarna begin die buitemuurse program, en die juffrou is nie meer beskikbaar vir toesig nie. Alternatiewe reëlings moet deur die ouer getref word om toesig na 13:40 te verseker of u kind kan by die naskool ingeskryf word.